Exposición - Ríos de Galicia, tesouros de vida
Do 18 de febreiro ao 4 de abril
Os ríos son correntes permanentes de auga que discorren por un leito fixo, formando redes cos seus afluentes. Os ríos verten as súas augas ao mar e algúns desembocan en lagos, completando o ciclo da auga da biosfera. Un dos elementos fundamentais da paisaxe galega é a existencia dunha ampla e densa rede fluvial, formada por miles de ríos e regueiros que recollen as augas das abundantes choivas e das fontes.
Neles conflúen especies acuáticas, anfibias e terrestres, ligadas de algún xeito á vida na auga, e outras en cambio, visítano ocasionalmente en busca de auga ou protección.
Estes ríos e regatos, ademais de cursos de auga e poderosos axentes xeolóxicos, son tamén un conxunto de ecosistemas de gran riqueza e complexidade que presentan unha notoria fraxilidade e teñen unha decisiva importancia para a conservación da biodiversidade.
Con estas actividades preténdese:
- Descubrir a fauna e flora dos ríos galegos.
- Recoñecer as diferentes partes dun río e as accións do mesmo no modelado xeolóxico.
- Valorar os ríos como recurso natural: recursos enerxéticos, de ocio, pesqueiros; e destacar a importancia da súa conservación.
Actividades a desenvolver
- Visita guiada á exposición “Ríos de Galicia, tesouros de vida”.
- Visionado do documental “Augas vivas de Galicia”
- Actividades de coñecemento das distintas especies do ecosistema fluvial.
- Actividade de reflexión sobre os efectos negativos da contaminación e sobreexplotación nos ríos galegos.