• centro de referencia para a educación ambiental en Galicia
    CEIDA
  • capacitar para a sostibilidade ambiental
  • sensibilizar sobre os problemas ambientais
  • coñecer para conservar o patrimonio natural
  • divulgar o coñecemento ambiental

IV Congreso de Educación Ambiental dos Centros de Ensino da Coruña

Vostede está aquí

IV Congreso de Educación Ambiental dos Centros de Ensino da Coruña
Data
xoves, 27 Maio, 2010
Lugar

Castelo de Santa Cruz (Oleiros)

Organiza

CEIDA

Colabora
  • Xunta de Galicia
  • Universidade da Coruña
  • Concello de Oleiros
  • Instituto Jane Goodall
  • Centros Comerciais Haley
Patrocina

Deputación da Coruña

Dirixido a

Centros educativos da provincia da Coruña

Descrición

Dentro do marco do Ano Internacional da Diversidade Biolóxica e da iniciativa "Cuenta Atrás 2010", o CEIDA organizou a cuarta edición do Congreso de Educación Ambiental dos centros de ensino da Coruña “Espazos para conservar. Defendamos o noso patrimonio natural”, no que participaron 5 centros educativos e contou con 87 participantes. Un ano máis foi patrocinado pola Deputación da Coruña e contou coa colaboración da Xunta de Galicia, a Universidad da Coruña, o Concello de Oleiros, o Instituto Jane Goodall e os Centros Comerciales Haley.

O escenario escollido para a celebración do congreso o 27 de maio de 2010 foi o Castelo de Santa Cruz, sede do CEIDA. A xornada arrancou co acto inaugural, que contou coa presenza do Excmo. e Magnífico Sr. D. José María Barja Pérez (reitor da Universidade da Coruña), D. Ángel García Seoane (alcalde do Concello de Oleiros), D. Federico Bogdanowicz (director executivo do Instituto Jane Goodall España) e D. Carlos Vales Vázquez (director do CEIDA).

Durante a xornada matinal os cinco centros participantes presentaron os proxectos de posta en valor do patrimonio natural galego desenvolvidos ao longo do curso 2009-2010. Complementaron as súas presentacións orais coa elaboración de diversos materiais (carteles, fotografías, maquetas,…) que se mostraron nas salas de exposicións do Castelo de Santa Cruz.

Trala exposición oral dos traballos, Federico Bogdanowicz explicou aos asistentes as liñas de traballo do Instituto Jane Goodall (IJG) e os programas que esta entidade está desenvolvendo en España. Os centros participantes recibiron de mans do director executivo o certificado que os acredita como membros do programa Roots & Shoots e que lles permitirá compartir ideas e traballar en rede con outros grupos de máis de 100 países. Trala comida, celebrada nos xardíns do Castelo, proxectouse o documental sobre a problemática do coltán “Sangre en el móvil” que foi comentado por Federico Bogdanowicz.

Para terminar a xornada, os nenos e nenas participantes puideron gozar do Monumento Natural Costa de Dexo-Serantes a través dun pequeno roteiro e visita á Aula do Mar, centro de visitantes deste espazo natural protexido.

Centros participantes
  • "Anfibios: de príncipes a mendigos" - CPI Os Dices (Rois)

Con este proxecto pretendeuse que o alumnado reparara e se interesara polo mundo dos anfibios, un conxunto de especies habituais ao noso arredor pero que en xeral pasan desapercibidos, polo que aínda seguen sendo os grandes descoñecidos. O que se pretendeu foi acostumar ao alumnado a observar a biodiversidade que os rodea, e coñecer os lugares de maior interese para os anfibios e as razóns de por que están en declive. Para elo fixéronse numerosas saídas en busca dos lugares propicios para o desenvolvemento desta especie, información que a maiores complementouse coa recompilación de material bibliográfico e diversas enquisas á xente do lugar. Con todo este material realizouse un vídeo documental e un traballo para a revista escolar do centro educativo para concienciar aos seus compañeiros/as acerca dos problemas dos anfibios.

 

  • "Kminho, o valor natural do Camiño de Santiago no Concello de Arzúa" - IES de Arzúa (Arzúa)

Aproveitando que o ano 2010 é o ano Xacobeo, e que o Camiño, tan coñecido a nivel mundial, se asocia sempre a valores espirituais, emocionais e culturais; quérese potenciar o seu valor natural. Así que este proxecto consistiu nun traballo que pretende conservar e poñer en valor o Camiño de Santiago en xeral, e en particular, o percorrido do Camiño francés. O que se trataba de facer cos chavales era analizar o medio físico e natural e as repercusións das actividades humanas sobre él, divulgar os espazos naturais de Arzúa sobre todo, e en xeral, analizar os datos de toda información aprendida acerca dp Camiño. Para elo, os alumnos puxéronse en contacto coa poboación local, fixeron saídas de campo, realizaron búsquedas bibliográficas… e integraron e difundiron toda esta información a través da elaboración dunha maqueta e dun dossier, que tamén presentaron no seu centro.

 

  • "Touriñán: onde nace o vento" - IES Maximino Romero de Lema (Baio – Zas)

Os alumnos e alumnas deste instituto pretenden achegar á xente un espazo natural costeiro, o Cabo Touriñán (Muxía), o cal está xa declarado LIC (Lugar de interese comunitario) e ZEPA (Zona de Especial Protección para as Aves). O proxecto basouse en dar a coñecer e apreciar o noso patrimonio natural, valorar os impactos ambientais negativos, e de concienciar á xente para preservar a riqueza natural mediante un desenvolvemento sostible, e evitar así a construción dunha piscifactoría nos arredores do Cabo Touriñán. Para levar a cabo este proxecto, traballaron con cartografía e información sobre a zona; buscaron datos na prensa e internet acerca das malas actuacións levadas a cabo nos últimos anos, e fixeron saídas de campo para visitar a zona de estudo. O resultado foi a elaboración dun vídeo, que se proxectou a maiores no centro para o resto do alumnado.

 

  • "Conservación da ría do Burgo" - IES Neira Vilas (Oleiros)

Tendo en conta que nos últimos anos este centro realizou estudos na ría do Burgo sobre a diversidade ornitolóxica, o seu aproveitamento marisqueiro e furtivismo, rexeneración, xestión de residuosna ría,…; consideraron necesario a maiores realizar un estudo sobre o seu estado de conservación, que demostre a necesidade da creación dun espazo protexido. Isto, unido a que a ría do Burgo ten unha gran diversidade e abundancia de aves, fai necesaria a súa protección para establecer medidas correctoras e protectoras adecuadas que disminúan o impacto sobre o hábitat. Con este fin o alumnado aprendeu a identificar e avaliar impactos ambientais, elaborar medidas de conservación e observar e distinguir especies de aves. Para isto, fixeron varias visitas á ría, procuraron bibliografía, elaboraron cartas dirixidas a diferentes periódicos para que colaborasen con eles na búsqueda de información, recolleron e analizaron mostras de augas… e publicaron o seu traballo a través de actividades, fotografías e vídeos que colgaron na página web do centro. Tamén se elaborou unha exposición sobre a avifauna da ría do Burgo.

 

  • "Moito máis ca pedras!" - IES Agra de Leborís (A Laracha)

Para acabar coa idea equivocada de que as pedras son elementos inertes e teñen únicamente valor económico, os chavales de A Laracha móstrannos co seu traballo que as rochas dan vida aos pobos, que delas dependen as características dos solos, a presenza de auga, e en xeral o desenvolvemento dos ecosistemas. Así, o alumnado aprende a valorar as rochas como patrimonio natural e cultural, a aprecialas e dalas a coñecer, e con todo elo amosar ao resto a comarca onde viven. As actividades levadas a cabo empezaron cunha aclaración de conceptos básicos, para ir pouco a pouco afondando máis na materia; tratouse o tema do coltán e das explotacións mineiras, fixéronse roteiros guiados, analizaron mostras nos laboratorios… que deu como resultado una maqueta sobre o val do Anllóns, sobre a que se situaron os puntos de interese natural e os de impacto ambiental.

CEIDA, Centro de Extensión Universitaria e Divulgación Ambiental de Galicia
Universidade da Coruña
Xunta de Galicia
Concello de Oleiros

Acerca do Ceida

Centro de Extensión Universitaria e Divulgación Ambiental de Galicia- promove a educación ambiental en todos os sectores sociais, así como o intercambio científico e cultural, traballando na procura de solucións aos problemas ambientais e fomentando as boas prácticas cidadás neste eido.

Castelo de Santa Cruz, s/n C.P. 15179 Liáns - Oleiros - A Coruña
 981 630 618
 981 614 443
ceida@ceida.org

Suscríbete ás nosas novas