Cando chegan as anduriñas?: observando os efectos do cambio climático na flora e fauna da nosa contorna

A fenoloxía estuda os cambios nas datas en que ocorren os diferentes fenómenos naturais (migración, reprodución, floración, fructificación, etc.) que se repiten ano tras ano nas prantas e animais e que están influenciados polas condicións meteorolóxicas. Actualmente, recoñécese o estudo da fenoloxía como un dos principais temas biolóxicos relacionados cos efectos do cambio climático, e existe un cúmulo de evidencias e numerosos traballos científicos onde se menciona un adianto temporal na fenoloxía de varias especies de prantas, aves e insectos.

O 'Programa de Seguimento Fenolóxico da Rede Española de Reservas da Biosfera', promovido polo Organismo Autónomo Parques Nacionales do  Ministerio de Agricultura y Pesca, Alimentación y Medio Ambiente, pretende avaliar, a través dos estudos fenolóxicos, os efectos do cambio climático no territorio das Reservas de Biosfera Españolas, involucrando no seu desenvolvemento aos diferentes sectores da sociedade. O eixo principal sobre o que se articula este proxecto é a participación cidadá na recompilación de datos fenolóxicos das especies de fauna e flora que actúan como bioindicadores nos seus territorios. 

Coa charla 'Cando chegan as anduriñas?: observando os efectos do cambio climático na flora e fauna da nosa contorna', a Reserva da Biosfera Mariñas Coruñesas e Terras do Mandeo e o Organismo Autónomo Parques Nacionales, co apoio do CEIDA, pretenden dar a coñecer este programa de ciencia cidadá, fomentando e animando a participación dos asistentes no seguimento continuado de especies comúns de fauna e flora presentes no territorio, e contribuindo así ao estudo e análise dos efectos do cambio climático no planeta.