Pesca e aves mariñas, grandes aliadas: Noraves e outros proxectos colaborativos co sector pesqueiro para a redución de interaccións coa fauna mariña

O proxecto NORAVES ten como finalidade avaliar a mortalidade accidental de aves mariñas asociada ás artes de pesca na Demarcación Mariña Noratlántica, prestando especial atención ás ZEPA mariñas, e propoñer medidas de mitigación e xestión para reducir o seu impacto. Para iso, analiza a actividade pesqueira, realiza seguimento das especies obxectivo e integra estes datos para identificar interaccións aves-pesca e áreas de solapamento. 

NORAVES destaca pola innovación metodolóxica, a participación do sector pesqueiro e a cooperación entre entidades públicas e privadas para xerar coñecemento útil para a conservación das aves mariñas. Os socios son CEIDA, SEO/BirdLife, o Centro Oceanográfico de A Coruña e Cory’s, e desenvólvese coa colaboración da Fundación Biodiversidad a través do Programa Pleamar, cofinanciado pola Unión Europea polo FEMPA. 

Esta xornada de presentación de resultados pretende dar a coñecer os resultados do proxecto NORAVES e, ao mesmo tempo, favorecer a creación de sinerxias con outros proxectos da mesma convocatoria que abordan temáticas afíns —como a mortalidade accidental e a interacción das aves mariñas e os cetáceos coa actividade pesqueira—, configurando unha xornada monográfica centrada nesta problemática, na que se presenten os resultados de distintos proxectos do Programa Pleamar.