Exposición 'Aves que alumean os nosos días' na biblioteca verde

A biblioteca e centro de documentación ambiental do CEIDA acolle nas antigas cabalarizas do Pazo de Lóngora a exposición  'Aves que alumean os nosos días',  do artista  Gustavo Pedre Vázquez (Monguiart).  A mostra poderá visitarse na planta baixa da biblioteca.

A exposición

'Aves que alumean os nosos días' presenta unha pequena mostra de aves presentes nos nosos bosques e cidades, especies que acompañan os nosos camiños cotiáns e que, moitas veces, pasan desapercibidas. A exposición propón unha invitación a deter a mirada e descubrir a riqueza da fauna que convive con nós, convertendo a simple observación nun momento de sorpresa e tamén nun espazo de desconexión do ritmo diario.

As obras parten dun soporte singular: lámpadas LED con forma de paxaro que o artista transforma para achegalas ao aspecto das aves reais. A partir destes obxectos sen vida, as pezas reconstrúen formas e cores inspiradas nas especies que podemos atopar na natureza próxima, creando un diálogo entre o obxecto artificial e a vida silvestre que o inspira.

Para a súa elaboración empregáronse técnicas e materiais diversos, desde pinturas acrílicas, sprays e vernices sintéticos, ata elementos reciclados recollidos tanto no bosque como na cidade. Cada soporte está deseñado especificamente para a ave que representa, co obxectivo de crear unha peza única.

Sobre o artista

Gustavo Pedre Vázquez mantivo desde a infancia unha relación estreita coa natureza e coa creación artística. O debuxo e a experimentación plástica acompañárono desde pequeno, e na adolescencia comezou a interesarse polo graffiti, un ámbito no que continuou desenvolvendo a súa creatividade a través de intervencións murais.

Xunto con outros artistas formou parte do Colectivo Variopinto, co que realizou murais temáticos e obradoiros dirixidos a público infantil e xuvenil.

Co paso do tempo xorde   Monguiart,  un proxecto persoal a través do que explora a súa creatividade con liberdade e de maneira máis espontánea. Nesta liña de traballo emprega soportes moi diversos, moitos deles recuperados ou reciclados na rúa ou no propio bosque, transformándoos en pezas artísticas que conectan natureza, reciclaxe e expresión plástica.

A exposición 'Aves que alumean os nosos días' poderá visitarse en   horario de luns a xoves, de 10 a 14 e de 16 a 19 h., e os venres de 9 a 14 h.