Baño de Bosque no Xardín do Pazo de Lóngora

Ás veces paseamos pola natureza, pero sen estar realmente nela, sen sentila. O   baño de bosque ou Shinrin-yoku   é unha invitación a parar, a experimentar a natureza de verdade, a permitir que nos penetre a través dos sentidos, e beneficiarnos do seu poder restaurativo da mente, do corpo e do espírito. Trátase simplemente de ESTAR na natureza, de conectar con ela a través dos sentidos, un paseo sen destino algún, entregándonos sen expectativas e permitíndonos empaparnos de todos os agasallos que o bosque ten para nós.

Con este obxectivo, o Centro de Documentación Ambiental do CEIDA organiza o vindeiro   12  de novembro   unha nova actividade de baño de bosque no   xardín do Pazo de Lóngora,   actual sede do centro, guiada por   Rosalía Santori,   especialista en experiencias de benestar interior e autora do libro   7 herbas máxicas  (Hércules de Edicións). As persoas asistentes poderán ademáis coñecer os fondos bibliográficos que esta biblioteca verde dispón vinculados a esta arte xaponesa.

A actividade   terá lugar ás 10 h.   cunha duración aproximada de   hora e media.  Como as prazas son limitadas, terán prioridade aquelas persoas que non tiveran asistido a outra actividade de baño de bosque neste centro.

Reserva de prazas: AS PRAZAS XA ESTÁN ESGOTADAS

ALGUNHAS RECOMENDACIÓNS PARA UN BAÑO DE BOSQUE DE 10! 

• Roupa acorde coa climatoloxía. Se o prognóstico é de chuvia leve, será unha boa oportunidade para experimentala a través dos sentidos. 
• Calzado cómodo para camiñar suavemente polo bosque.
• Mochila sen moito peso coa botella de auga e unha toalla pequena.

"Un baño de bosque é a arte de conectar coa natureza a través dos sentidos. O único que temos que facer é aceptar a invitación. A natureza fai o resto".  Qing Li