Pradeiras mariñas, tesouros de biodiversidade

As pradeiras de fanerógamas mariñas teñen unha elevada importancia ecolóxica, xa que proporcionan numerosas vantaxes nos hábitats circundantes. Os impactos antropoxénicos aos que están sometidas provocan a súa redución, por iso que, dende hai uns anos, está a incrementarse a creación de programas de seguimento e protección.

Promover a participación da sociedade na conservación das pradeiras mariñas incrementará o coñecemento das mesmas e potenciará entre a opinión pública a necesidade da súa protección. A colaboración con sectores vinculados a estes hábitats permitirá, ademáis, obter información clave que axude a comprender e cuantificar o valor socio-económico que xeran para as comunidades locais, aspecto moi relevante para fomentar esta maior implicación social na súa conservación.

Co fin de concienciar sobre a importancia da conservación das pradeiras de fanerógamas mariñas da costa cántabro-atlántica (Galicia, Asturias, Cantabria e Euskadi), o CEIDA pon en marcha o proxecto 'ZOSTERA. Pradeiras mariñas, Tesouros de Biodiversidade', co que pretende dar a coñecer os beneficios ambientais, económicos e sociais que as pradeiras proporcionan entre a cidadanía, así como a integración de colectivos específicos da poboación local na conservación mediante a aplicación dun programa de seguimento e protección.