Clube de lectura

O clube de lectura CLOROFILA é unha invitación para achegarse á natureza a través da literatura. Xa sexa dende a narrativa ou do ensaio, este clube pretende dar a coñecer obras de temática ambiental para explorar o mundo que nos rodea, creando un espazo para a conversa e o intercambio de ideas, unha chamada á acción a través da lectura.

Mais CLOROFILA é, sobre todo, un espazo para coñecernos e gozar das lecturas verdes, para o diálogo colectivo, para compartir, para falar de forma distendida e poñer en común temas ambientais e sociais que nos afectan a todos.

Está dirixido a todas aquelas persoas que lles guste ler, non buscamos un público experto nin comentarios especializados, só persoas dispostas a compartir con nós as súas impresións tras a lectura das obras propostas. 

O grupo de lectura ofrece 12 prazas, e en cada convocatoria abrimos as sesións para que as persoas interesadas poidan anotarse e recoller un exemplar do libro, que sempre atoparán dispoñible en préstamo na nosa biblioteca verde.

CLOROFILA forma parte do clube de lecturas da Red de Centros de Información e Documentación Ambiental (RECIDA), por iso a maior parte dos títulos están escritos en castelán. Non obstante, trataremos de incluír obras en galego.

Para máis información:  documentacion@ceida.org  - 981 630 618

Neste momento estamos lendo: 

EL ESTORNINO DE MOZART Autora: Lyanda Lynn Haupt Data da sesión: mércores, 10 de abril de 2024. Hora: 19 h. Sinopse: contan que o 27 de maio de 1784, Wolfgang Amadeus Mozart atopouse nunha tenda viensea cun coqueto estornino que estaba a cantar unha versión improvisada do seu Concerto para piano nº 17 en sol maior. Atraído polo seu canto, mercouno e levouno á casa como mascota. Din que compartiu a súa vida con este estornino durante tres anos, influíndo na súa obra, servíndolle de compañeiro, distracción e ata inspiración. Dous séculos despois, os estorninos son despreciados por moitas persoas en Norteamérica, por tratarse dunha especie  invasora non autóctona nesta país. Invaden hábitats, compiten coas aves locais, destrozan os cultivos… A ornitóloga e naturalista Lynn Haupt, coñecedora da historia do estornino de Mozart, decide rescatar unha cría de estornino, e convivir con ela, quedando prendada pola súa intelixencia e espíritu xoguetón! Neste ensaio naturalista que mistura historia, filosofía, autobiografía, música… a autora entrelaza a súa investigación persoal coa historia do compositor austríaco, ofrecendo unha insólita ollada á amizade entre os humanos e os animais, o mundo secreto dos estorninos e a natureza da inspiración creativa.. Máis información do autor:  https://capitanswing.com/autores/lynn-haupt-lyanda

Estas son as lecturas que xa limos no clube: