Un Bosque de Segredos (Programa Mundos Agochados)

A actividade UN BOSQUE DE SEGREDOS forma parte do programa de educación ambiental MUNDOS AGOCHADOS, que pretende achegar a natureza de proximidade ás contornas urbanas, promovendo o seu coñecemento, valoración e conservación. A través de diferentes hábitats —beiramares, rías, bosques e xardíns— propón descubrir a biodiversidade que nos rodea.

Está composto por sete actividades que combinan ciencia, cultura e educación ambiental en formatos diversos, desde percorridos guiados ata xogos colectivos. Tamén a literatura e a tradición oral como ferramentas para explorar a nosa relación coa natureza forman parte do mesmo. Un programa para comprender os grandes desafíos ambientais desde o local e gozar dos «mundos agochados» que existen ao noso redor.

• Ofrecer unha experiencia divertida de inmersión coa natureza para lograr a fascinación polos soutos e bosques dos máis pequenos e pequenas, a través da exploración libre e guiada.
• Estimular a curiosidade e coñecemento da biodiversidade, aprendendo a identificar as principais características das árbores máis frecuentes presentes nos bosques galegos así como algunhas especies de aves e mamíferos.
• Coñecer e poñer en práctica diversas habilidades e boas prácticas para a observación da natureza.
• Transmitir valores de conservación e sostibilidade ambiental, comprendendo a importancia de coidar e protexer os espazos naturais próximos.
• Fomentar a lectura cientifica a través do contacto con literatura infantil de natureza.

2h, 2h-30 min.

Esta actividade realizarase no Bosque dos Veciños (Oleiros), e rematará no Centro de Documentación Ambiental Domingo Quiroga (Pazo de Lóngora, Oleiros).