Pradarías mariñas, Tesouros de biodiversidade (Programa Mundos Agochados)

A actividade PRADARÍAS MARIÑAS, TESOUROS DE BIODIVERSIDADE forma parte do programa de educación ambiental MUNDOS AGOCHADOS, que pretende achegar a natureza de proximidade ás contornas urbanas, promovendo o seu coñecemento, valoración e conservación. A través de diferentes hábitats —beiramares, rías, bosques e xardíns— propón descubrir a biodiversidade que nos rodea.

Está composto por sete actividades que combinan ciencia, cultura e educación ambiental en formatos diversos, desde percorridos guiados ata xogos colectivos. Tamén a literatura e a tradición oral como ferramentas para explorar a nosa relación coa natureza forman parte do mesmo. Un programa para comprender os grandes desafíos ambientais desde o local e gozar dos «mundos agochados» que existen ao noso redor.

• Transferir coñecemento e divulgar a biodiversidade e os servizos que proporcionan as pradarías mariñas da costa galega.
• Reforzar os vínculos e o sentido de pertenza do alumnado co seu propio territorio a través do coñecemento dun dos ecosistemas moi valiosos e descoñecidos.
• Provocar, a través do coñecemento e o vínculo emocional e tamén da fascinación que estes ecosistemas producen no alumnado, unha maior actitude e compromiso cara a conservación do medio ambiente.
• Fomentar a implicación da comunidade educativa no coñecemento para a conservación das pradarías mariñas.
• Descubrir a fraxilidade destes ecosistemas tan valiosos ante a contaminación, cambio climático ou malas prácticas en actuacións no litoral xa sexan extractivas, infraestruturas,etc.

2 h.

Pradaría da Ría do Burgo, concretamente na zona interior da praia de Sta Cristina (Oleiros).