Canta cuco, canta cuco: a natureza galega a través do cancioneiro tradicional (Programa Mundos Agochados)

A actividade CANTA CUCO forma parte do programa de educación ambiental MUNDOS AGOCHADOS, que pretende achegar a natureza de proximidade ás contornas urbanas, promovendo o seu coñecemento, valoración e conservación. A través de diferentes hábitats —beiramares, rías, bosques e xardíns— propón descubrir a biodiversidade que nos rodea.

Está composto por sete actividades que combinan ciencia, cultura e educación ambiental en formatos diversos, desde percorridos guiados ata xogos colectivos. Tamén a literatura e a tradición oral como ferramentas para explorar a nosa relación coa natureza forman parte do mesmo. Un programa para comprender os grandes desafíos ambientais desde o local e gozar dos «mundos agochados» que existen ao noso redor.

• Coñecer aspectos vinculados coa música e poesía de tradición oral galega e nomeadamente do fondo Schubarth-Santamarina, depositado no Arquivo do Patrimonio Oral e Inmaterial (APOI) do Museo do Pobo Galego: contexto social e demográfico das recollidas,  achegamento ao contido, e emprego posterior do mesmo.
• Identificar que especies son máis frecuentes na poesía de tradición oral: cales son, onde viven e que relación tiñamos con elas.
• Reflexionar sobre o coñecemento actual das diferentes especies e hábitats máis citados no cancioneiro, sobre o seu estado de distribución e conservación, e sobre como mudou a nosa relación con elas.
• Coñecer pequenas intervencións de infraestrutura verde susceptible de incorporar en contornas urbanas ou semiurbanas que favorecerían un maior contacto coa natureza na sociedade urbana actual.
• Escoitar, cantar e tocar algunhas destas melodías e, reflexionar sobre que natureza estaría presente hoxe se creásemos novas cantigas: con que especies nos relacionamos, que cualidades teñen para nós....e se cadra, lanzarnos a compoñelas.

1h.30 min.

Desenvolverase no Centro de Documentación Ambiental Domingo Quiroga, a biblioteca verde do CEIDA, con sede no Pazo de Lóngora (Liáns, Oleiros).