«Mundos agochados», un novo programa de educación ambiental para descubrir a natureza que nos rodea

«Mundos agochados» é o novo programa de educación ambiental do CEIDA, unha proposta que convida a achegarse á natureza de proximidade e a descubrir a biodiversidade que habita nas nosas contornas cotiáns.

O programa nace co obxectivo de achegar a natureza próxima ás contornas urbanas, promovendo o seu coñecemento, valoración e conservación. Porque, moitas veces, para descubrir a riqueza natural que nos rodea non é preciso ir moi lonxe: abonda con aprender a mirar e observar o que temos ao noso redor.

A través de diferentes hábitats —costas, rías, bosques e xardíns—, «Mundos agochados» propón explorar os espazos naturais próximos desde diferentes perspectivas e descubrir as especies, relacións ecolóxicas e paisaxes que forman parte do noso día a día.

A proposta está composta por sete actividades de educación ambiental que combinan ciencia, cultura e participación en formatos diversos. Percorridos guiados, experiencias de observación e xogos colectivos permiten achegarse á biodiversidade dun xeito activo, participativo e adaptado a diferentes públicos. A literatura e a tradición oral teñen tamén un papel destacado no programa, como ferramentas para explorar a nosa relación coa natureza e recuperar historias, palabras e saberes vinculados ao territorio. Porque coñecer a nosa contorna tamén significa escoitar as voces e relatos que o acompañaron ao longo do tempo.

«Mundos agochados» propón así unha mirada diferente sobre os espazos que habitamos: descubrir o extraordinario no cotián, comprender os grandes desafíos ambientais desde o local e gozar da riqueza natural que existe ao noso redor. 

Máis información de cada unha das actividades: 

• Conexións líquidas. Da poza ao océano
• Pradarías mariñas, Tesouros de biodiversidade
• Plan B. Misión Climática en Oleiros
• Un Bosque de Segredos
• Operación Biodiversidade. Un plan segredo para a natureza
• O Caderno de Emilia: Biodiversidade a través das letras
• Canta cuco, canta cuco: a natureza galega a través do cancioneiro tradicional